گلنلره محبّت ایت ، وفا یئتور گئدنلره

فدا اولوم بوتون گوزه ل ، گلن قوناقووه  وطن

او قدری مهربانیسن ، آنا دئیوبدیلر سنه

گویول گل آلچاق ایله قوی ، دوشوم ایاقووه  وطن

اوشاقووم نه عیبی وار ، منه آجیخلانا آنام

فدا اولوم آجیخلارا ، او قاش قباقووه  وطن

صفالی دامه نون وئرر ، منه امید زندگی

اولام هایاندا وارهوس ، اوباغچا باغووه  وطن

بیرعمری ایچمیشم سنون ، سویون بولاغدا چشمه ده

قالوبدی کوزه حسرتی ، قوری بولاغووه  وطن

وطن وطندی فرقی یوخ ، محبّت اولسا آز یا چوخ

باخور بو قارنیم آج یا توخ ، یانان چراغووه  وطن

شهیددی کیمسه نین قانی ، سنون یولوندا گرآخا

بو دِین آغیردی من نجه ، چیخیم  قباقووه  وطن

سالوبدی آیریلیق بیزیم ، آرایه  گر اوزاقلیقی

غلام خانه زادییم ، قوجا ، اوشاقووه  وطن

بو آیریلیقدی ، جبریدی ، فلک بونا رضا اولوب

ئولومده دوتسا دامنیم ، گللم  سُراغووه  وطن

نئدیم کی چاره قالمیوب ، بو آیریلیقدا سّر وار

یانوب الولانوب گرک ، دؤزم فراقووه  وطن

هاچان بوراخدی دامه نون ، بوغفلت اللریم منیم

اورک دویر بو سینه ده ، گله قوجاقووه  وطن

بوخیرداجا اورکده چوخ ، بویوکدی دردی« رایتین»

بیرآز اگیل گَتور دئیوم ، یاواش گولاغووه  وطن



طبقه بندی: شعر ی از رایت عبادی منامن،
برچسب های منامن: شعر، شعر رایت عبادی منامن، شعر وطن، سعر ترکی، خلخال، هشجین، مرتضی غلامی منامن،
دنبالک ها: شعر رایت عبادی منامن،

تاریخ : سه شنبه 8 اردیبهشت 1394 | 07:33 ق.ظ | منامن نویسنده : مرتضی غلامی منامن | نظرات
.: Weblog Themes By M a h S k i n:.